Háskóli unga fólksins og Vísindaveisla dagana 4. og 5. maí
Á hundrað ára afmæli Háskóli Íslands 2011 var tímamótunum fagnað víða um land með svokallaðri Háskólalest sem ferðaðist um landið við miklar vinsældir. Viðtökur voru með eindæmum góðar og fjölmenntu landsmenn á öllum aldri á viðburði Háskólalestarinnar um landið vítt og breitt.
Vorið 2012 leggur lestin af stað á ný með fræði og fjör fyrir alla. Í maí verða heimsóttir fjórir áfangastaðir: Kirkjubæjarklaustur, Siglufjörður, Grindavík og Ísafjörður.
Fyrsti áfangastaður lestarinnar verður Kirkjubæjarklaustur dagana 4. og 5.maí. Fyrri daginn sækja nemendur úr Víkurskóla og Kirkjubæjarskóla fjölbreytt námskeið í Háskóla unga fólksins en laugardaginn 5. maí verður litrík vísindaveisla fyrir alla aldurshópa.
Vísindaveislan verður haldin í félagsheimilinu Kirkjuhvoli og Íþróttahúsi grunnskólans
kl. 12 til 16 og þar verður margt í boði; stjörnutjald, sýnitilraunir, eldorgel, tæki og tól, japönsk menning, jarðvísindi, þrautir og leikir. Auk þess verður Sprengjugengið landsfræga með tvær sýningar í Kirkjuhvoli, kl 12:30 og 14:30.
Dagskrá Háskólalestarinnar er öllum opin, aðgangur er ókeypis og allir hjartanlega velkomnir!
