Haustferð 2026

 

Það var mikil eftirvænting í loftinu þegar nemendur og starfsfólk Kirkjubæjarskóla lögðu af stað í hið árlega haustferðalag skólans. Ferðinni var heitið í hina fögru náttúruperlu Skaftafell og lék veðrið við hópinn á þessum frábæra degi.

Eins og svo oft áður var það Gunnar Valdimarsson sem keyrði hópinn á áfangastað af sinni kunnu snilld. Við færum honum okkar bestu þakkir fyrir frábæra samfylgd og liðlegheit.

Þegar komið var í Skaftafell voru gönguskórnir reimaðir og haldið af stað í hinar ýmsu gönguferðir um svæðið. Nemendum var skipt upp eftir aldri til að allir fengju áskorun við sitt hæfi. Yngsta stigið gekk hina fallegu leið að Svartafossi þar sem stuðlabergsmyndanirnar vöktu verðskuldaða athygli. Mið- og elsta stig fóru hins vegar í lengri göngu. Þau gengu fyrst upp að Sjónarnípu, þaðan sem stórkostlegt útsýni opnaðist yfir Skaftafellsjökul. Eftir að hafa notið útsýnisins lá leið þeirra einnig niður að Svartafossi.

Að gönguferðunum loknum tók Elísabet skólastjóri á móti öllum með bros á vör, en hún var þá búin að kveikja á grillinu og grilla ljúffengar pylsur handa svöngum göngugörpum. Það var sannarlega gott að næra sig eftir útiveruna og spjalla saman í blíðunni.

Eftir ljúft hádegishlé hófst seinni hluti dagsins með fjölbreyttum verkefnum. Yngsta stigið fór í spennandi og fjörugan ratleik um nágrennið. Eldri nemendurnir fengu hins vegar áhugaverða fræðslu um Gamla Skaftafellsbæinn og skoðuðu hinar fornu tóftir sem leynast á svæðinu..

Á heimleiðinni var stoppað við hinn tignarlega Lómagnúp. Þar gæddu allir sér á ljúffengri síðdegishressingu í fallegu umhverfi áður en keyrt var heim á leið.

Þetta var í alla staði mjög vel heppnuð ferð sem einkenndist af gleði, fræðslu og frábærri samveru. Hún sýndi enn og aftur hve dýrmætt það er fyrir skólasamfélagið að njóta náttúrunnar saman og styrkja vinaböndin utan skólastofunnar. Við þökkum Vatnajökulsþjóðgarði fyrir að taka svona vel á móti okkur.